Late

The masoned house it dinled through; It dung the ship, it cowped the coo’. The rankit aiks it overthrew, Had braved a’ weathers; The strang sea-gleds it took an’ blew Awa’ like feathers.

p. 126The thrawes o’ fear on a’ were shed, An’ the hair rose, an’ slumber fled, An’ lichts were lit an’ prayers were said Through a’ the kintry; An’ the cauld terror clum in bed Wi’ a’ an’ sindry.

p. 126

To hear in the pit-mirk on hie The brangled collieshangie flie, The warl’, they thocht, wi’ land an’ sea,  Itsel’ wad cowpit; An’ for auld airn, the smashed debris By God be rowpit.

Meanwhile frae far Aldeboran, To folks wi’ talescopes in han’, O’ ships that cowpit, winds that ran, Nae sign was seen, But the wee warl’ in sunshine span As bricht’s a preen.

p. 127I, tae, by God’s especial grace, Dwall denty in a bieldy place, Wi’ hosened feet, wi’ shaven face, Wi’ dacent mainners: A grand example to the race O’ tautit sinners!

p. 127

The wind may blaw, the heathen rage, The deil may start on the rampage;— The sick in bed, the thief in cage—  What’s a’ to me? Cosh in my house, a sober sage, I sit an’ see.

An’ whiles the bluid spangs to my bree, To lie sae saft, to live sae free, While better men maun do an’ die In unco places. “Whaur’s God?” I cry, an’ “Whae is me To hae sic graces?”

p. 128I mind the fecht the sailors keep, But fire or can’le, rest or sleep, In darkness an’ the muckle deep; An’ mind beside The herd that on the hills o’ sheep Has wandered wide.

p. 128

I mind me on the hoastin’ weans— The penny joes on causey stanes— The auld folk wi’ the crazy banes, Baith auld an’ puir, That aye maun thole the winds an’ rains An’ labour sair.

An’ whiles I’m kind o’ pleased a blink, An’ kind o’ fleyed forby, to think, For a’ my rowth o’ meat an’ drink An’ waste o’ crumb, I’ll mebbe have to thole wi’ skink In Kingdom Come.

p. 129For God whan jowes the Judgment bell, Wi’ His ain Hand, His Leevin’ Sel’, Sall ryve the guid (as Prophets tell)  Frae them that had it; And in the reamin’ pat o’ Hell, The rich be scaddit.

p. 129

 Prev. P 52/55 next